စိတ်ကူးလွန်ခေတ်၊ လက်တွေ့ကြည့်ဝါဒနှင့် ပညာစီးကြောင်း(၃)
ပညာနှင့် ပတ်သက်၍ ပြောလျှင် ပီတာဒရပ်ကား အကြောင်း မပြော၍ မဖြစ်ပေ။ ဒရပ်ကားက ၁၉၆၂ ခုနှစ်တွင် ကောလိပ်သို့ မသွားတော့ဘဲ အလုပ်ဝင်လုပ်သည်။ သူ့အဖေကြီးက သူ့သား (ပီတာဒရပ်)အား ထင်ရှားသော ကုန်အရောင်းအ၀ယ်လုပ်ငန်းတွင် အပ်နှံပေးနိုင်ခဲ့သည်။ နောက်အနှစ် သုံးဆယ်ကြာ ပီတာဒရပ်၏သားကိုယ်တိုင် ကောလိပ်မတက်ဘဲ အလုပ်ဝင်လုပ်မည် ကြံပြန်သည်။ ဒရပ်ကား၏ အဖေလက်ထက်က ဒရပ်ကားကို အလုပ်ရှာပေးနိုင်သော်လည်း သူ့လက်ထက်တွင် သူ့သားကို အလုပ်ရှာမပေးနိုင်တော့။ ထိုခေတ်က ကောလိပ်ပညာရေးသည် အလုပ်ကောင်းရဖို့ မရှိမဖြစ် ဖြစ်နေသည်။ ၀င်ငွေကောင်းသော လုပ်ငန်းများက ဘွဲ့ရပြီးသူကိုမှ လက်ခံကြတော့သည်။ ဤသည်မှာ ကျောင်းပညာရေးသည် ၀င်ငွေ သို့မဟုတ် စီးပွားရေး၏ အရင်းအမြစ် ဖြစ်လာသည့် သဘောပင်ဖြစ်သည်။ မြေယာ လုပ်အား ငွေစသော အရင်းအမြစ်များ လိုအပ်သည် မှန်သော်လည်း ပညာက ပထမတန်းစား ဖြစ်လာ၍ ၎င်းတို့မှာ ဒုတိယနေရာသို့ ရွှေ့လျောသွားကြသည်။ ပညာရှိလျှင် ထိုအရင်းအမြစ်များကိုလည်း ရှာဖွေ၍ ရနိုင်သည်ဟု ဆိုသည်။ ပညာဆိုသည်မှာ အသုံးချပညာ စီးပွားရေး လူမှုရေး ရလာဘ်များရနိုင်သော ပညာကိုသာ ဆိုလိုသည်။ ဒုတိယကမ္ဘာစစ်အပြီးမှ ယခုအထိကို စီမံခန့်ခွဲမှု တော်လှန်ရေးဟု ဆိုခဲ့သည်။ စီမံခန့်ခွဲမှု ပညာဆိုသည်မှာ ရှိပြီး ဖြစ်သော အသိပညာ ဗဟုသုတကို ပိုမိုထိရောက်အောင် လုပ်ခြင်းပင်ဖြစ်သည်။ သို့သော် စီမံခန့်ခွဲမှုသည် လွန်ခဲ့သော အနှစ် ၄၀၀၀ ကျော် အီဂျစ်ပိရမစ်များ တည်ဆောက်စဉ် ကတည်းက ရှိခဲ့ပါသည်။
ယနေ့ခေတ်တွင် လူတစ်ယောက် တစ်နေ့ ဘယ်နှစ်နာရီ အလုပ်လုပ်သလဲဟု မမေးကြတော့။ လုပ်အားခ ဘယ်လောက်ရလဲဟုသာ မေးကြတော့သည်။ ကျောင်းသား တစ်ယောက်ဆိုလျှင် တစ်နေ့ဘယ်နှစ်နာရီ စာကျက်သည်ဆိုသော အဖြေကို မလို။ စာမေးပွဲအောင်သလား အမှတ်ဘယ်လောက်ရသလဲ ဆိုသည်တို့သာ အဓိကဖြစ်လာသည်။ လုပ်အားခများများရသည် စာမေးပွဲ အမှတ်ကောင်းကောင်းဖြင့် အောင်သည်ကိုသာ အလုပ်ဖြစ်သည်ဟုဆိုသည်။ ဆိုလိုသည်က အက်ရှင် Action ကိုမကြည့်တော့။ result ကိုသာ ကြည့်သည့်သဘော ဖြစ်သည်။ ကြိုးစားမှုကို အလုပ်ဟု မယူဆကြတော့။ ဥပမာဖြင့် လူတစ်ယောက်က ကျောက်တုံးတစ်တုံးကို ကြိုးစားပမ်းစားရွှေ့သည်။ အချိန်သာ ကုန်သွားသည်။ ကျောက်တုံးက မရွေ့။ နောက်တစ်ယောက်က ရွှေ့ကြည့်သည်။ ဤအတိုင်း မရမှန်းသိသဖြင့် “ကုတ်”အားကို သုံးပြီးရွှေ့လိုက်သည်။ အချိန်တိုအတွင်းမှာ ကျောက်တုံးက ရွေ့သည်။ တစ်နည်းအားဖြင့် အလုပ်ဖြစ်သွားသည်။ လိုအပ်သည်က ဒါပဲဖြစ်သည်။ ဤနေရာမှာ ကြိုးစားမှုနှင့် ဉာဏ်ပညာကို ခွဲခြား၍ သိနိုင်သည်။ ပထမလူက ဉာဏ်မသုံးဘဲ ပင်ပင်ပန်းပန်း ကြိုးစားခဲ့သည်။ မအောင်မြင်။ အလုပ်မဖြစ်။ ဒုတိယလူက ပထမလူလောက် မကြိုးစားသော်လည်း ဉာဏ်ကိုသုံးတတ်သည်။ အောင်မြင်သည်။ အလုပ်ဖြစ်သည်။ ပညာဆိုသည်မှာ အထွေထွေသုတ မဟုတ်။ အထူးသိ အထူးကျွမ်းကျင်သောပညာ အသုံးဝင်သောပညာကိုသာ ယူတော့သည်။ ရှေးက ပညာတတ်ဟူသည် အထွေထွေသိသူများ ဖြစ်သည်။ ၎င်းပညာရှင် ပညာရှိ ပညာတတ်တို့က အကြောင်းအရာများစွာကို ပြောနိုင်ဆိုနိုင်ကြသည်။ ယနေ့ နိုင်ငံတကာတက္ကသိုလ်တို့တွင် ရှေးရိုးစဉ်လာ ပညာတတ်မျိုးကို ပညာတတ် ပညာရှင်ဟု သဘော မထားကြတော့။ အပေါ်ယံသိသူ Dilettante ဟုသာ သဘောထားကျတော့သည်။
ယနေ့ပညာဆိုသည်မှာ ထိထိရောက်ရောက် ပြုလုပ်နိုင်စွမ်း၌ အာရုံစိုက်သောပညာ ရလာဒ်ပေါ်၌ အာရုံစိုက်သောပညာ ဟူ၍ ဖြစ်သည်။ ရှေးက တက္ကနိဟုဆိုကြသော လက်မှုအတတ်ကို ယခုအခါ knowledge သို့မဟုတ် discipline ဟု ပြောင်းလဲ အသုံးပြုလာကြသည်။
Popularity: 70%
ဖတ်ရင်း မူးလာသည်။
မူးရင်း ဆက်ဖတ်သည်။
ပညာဆိုသည့် အဖွင့်ကို တကယ်စိတ်ဝင်စားပါသည်။
တောက်! ကောင်းတယ်ဗျာ …
2 Responses to “စိတ်ကူးလွန်ခေတ်၊ လက်တွေ့ကြည့်ဝါဒနှင့် ပညာစီးကြောင်း(၃)”